經過一個泰國之旅，又多左4對手套。版主緊係試左先，等我了解好晒每對手套嘅特性先正式發售。站係我立場，唔希望搵大家做白老鼠。亦都唔想大家陪版主一齊做。即使對手套平也好貴也好。唔想大家拎啲錢去搏，更唔想賣一啲連自己都未試過嘅產品比你地。因為每個搵版主買手套嘅朋友，都有一個屬於佢嘅故事。
例如有位朋友買對手套比佢細佬，因為未出黎番工，真係將一分一毫儲起黎為左買一對手套。如果試都唔試賣一對有問題嘅手套比佢，之後唔岩用或者有問題。對用家一定係唔好。
所以每款賣出黎嘅手套，都喺推出之前用個幾兩個月以上嘅時間去試。希望更了解對手套嘅特性。喺你地有限嘅資金同根據你地嘅要求提供意見同選擇。我唔敢講我有幾偉大，因為我係有賺錢，都要開飯嘅。而且我都係同大家一樣，都係一位守門員。以前買手套中伏多到唔知幾多次。所以非常明白大家嘅心理。所以希望幫大家試左先，過濾左啲有中伏機會嘅手套。當中都試過十幾個品牌，最終因為種種原因冇推出。而好多手套都係真金百銀比錢去買黎試。結果搞到一屋都係手套。有啲手套做完測試之後就咁放喺度，擺到乳膠氧化，結果又浪費左一對手套。
對於守門員黎講，除左技術之外，一對好嘅手套真係幫到唔少。手套係每個龍門嘅最親密拍拖，由設計，物料等，每個細節都會有一定程度嘅影響。有幾啜，有幾耐磨，手感如何，一個 Specifications 絕對反映唔到對手套好定壞。甚至反映唔到一對手套值唔值呢個價錢。
所以透過試用後，用一個合理嘅價錢「嘗試」話比大家知點解值呢個價錢。加上每次嘅試用過程，都會感受下對手套嘅優點缺點，有咩特別之處。因為就算科技再好，都唔會有一對「完美」嘅手套。學胡慧沖咁講「百貨百客」同「鹹魚青菜，各有喜好」。版主只係用一個第三身同較「客觀」嘅角度去試呢一對手套，去透過有限文字，圖片及片段去講比大家知。嘗試同大家一齊搵到對岩你用嘅手套。
至於呢幾對H3，應該連續係呢個月盡量用，盡量試，有幾好，好唔好，而家嘅我都係完全唔知。因為好多手套公司嘅老闆同我講，佢品牌嘅手套一定係最好。就算賣開嘅牌子，都要試一試對手套。
反正除左打龍門，試手套亦都係版主嘅興趣同工作。
期望盡快將呢幾對嘅手套嘅測試話比大家知。
Search